صحيفة شعراء العرب الالكترونية

بانت سعاد.. للشاعر ابراهيم المرواني

  • 0

قال شاعر !! قلت ليتك بس شاعر
بالخيال اللي يهيم بكل واد
كان ما تغبط رهيفين المشاعر
بالشعور اللي تسبب بالسهاد
ما كتبته لجل اعده بالمنابر
ما بغيت ابهر به عقول العباد
جيت امره من شقا الايام عابر
لين صار لمهجر احزاني بلاد
لو بحوره سجن وبيوته عنابر
وانتظاره نار واقباله رماد
كيف احرر هاجسي منه واهاجر
واترك الافكار في وضع الحياد
كم قصيدة حشرجت وسط الحناجر
تندب الايام وتلوم البعاد
وكم قصيدة تحفر بصدري مقابر
تدفن الاحلام في وقت المهاد
اكتم العبره واعديها واكابر
لين صدري من عنا الايام جاد
بالحنين اللي ملا صدر الدفاتر
وكل ما زاد الوله زاد المداد
ما يجف الوجد وعروقي محابر
وما ينوح الورق لو بانت سعاد

ابراهيم المرواني

أترك تعليق



التعليقات مغلقة.