صحيفة شعراء العرب الالكترونية

ليل الغرام للشاعر : ناصر الجميلي

  • 0

الدروب اللي غدت مهجوره

صرت اخاف امرها وامشيها

 

ذبلت ورود الغلا وزهوره

بالدروب اللي مشينا فيها

 

عقب ماهي بالوفا معمورة

والمواصل بيننا .. محييها

 

انتهى ليل الغرام .. ودوره

وقفل الذكرى على مافيها

 

تاركٍ لي …لوحة مكسورة

من غلاها .. ماقويت ارميها

 

والسوار ..وأمنية مأسوره

والمكان اللي جمعني فيها

 

تستفز هجوسي المذعوره

كلما لدت …..عيوني فيها

 

واسري بليلٍ غشى ديجوره

وفي رجاه هجوسي اعنيها

 

ويمه اسج الفكر وشعوره

وانتقي …قصايدٍ ترضيها

 

وكلما مرت فبالي صورة

قمت اجر لحوني الاحيها

 

لين وجه الصبح شع بنوره

وشتّت هجوسٍ سرى ساريها

 

واستحل الجو عقب سروره

ضيقةٍ ازريت لا اخفيها

 

وقام عذري يمسح السبورة

والقصيدة ضيّعت راعيها

 

وذاب قاف البيت في تنوره

قبل ما تصافح يدي يديها

 

قافي اللي يشبه الأسطورة

في بدايتها .. وفي تاليها

 

وصحت بأعلا الصوت يااموره

خوذي اوراق الغلا ما ابيها

 

وكان شفتي صورةٍ مكسورة

قبل ماتجرح يديك ارميها

 

من يبي يدرك جمال الصورة

لايناظر جهه وحده فيها

 

عظم الله اجرها مشكوره

واحسن الله عزى قافي فيها

 

ياهقاوي خطوتي مأجوره

عوّدي لأحلامك .. وواسيها

 

– ناصر الجميلي

أترك تعليق



التعليقات مغلقة.