صحيفة شعراء العرب الالكترونية

الشعر وتفاعيله .. لـ عماد السرحان

  • 0


يا أمسيات الشعر قلّ الشعر هيله
دق النجر ما عنى تكييف من ذاقه!

من سابق الكمّ لجْل يزيد في كيله
مافاز بالمارثون اللي فقد ساقه !

صح الله لسانك و مبدع بلا حيله
وش حيلة اللي ضعف حاله من افراقه ؟

تدري وش اللي بلا الشعر و تفاعيله
اقزام شافوا عمرهم ناس عملاقه

قمت اسفك الشعْر حتى قال يا ويله
من يقنعه بانّيٓ مضمّد لإراقه

ماني مع السرب دام السرب تكحيله
الحر خلا له الانظار منساقه

في كثرة الشيء لا يعنيك تبجيله
الورد عمره قصر يومٍ غدا باقه

الساحر اللي تداعب يدْهٓ منديله
علم البيان و برز سيفه بأوراقه

واللي رسم لوحته بادق تفصيله
وشلون يرسم خفوقي لحظه اشهاقه

اللحظه اللي عيونه تأسر لجيله
ماكنه الا عيون الريم احداقه

حتى الحسن يوم شافه صار إكليله
يبغى يتوج على راسه و لا لاقه

فيه الحلا صعب وصف و صعب تخييله
حتى لو اني بحرت ب عالي اعماقه

لحْلوّ جوّي ، وزاد لسان تهليله
هذا مزاج العشير امروق اخلاقه!

ان غاب عني ضحكت و قلت يا حليله
وان غبت عنه فضحه الدمْع واشواقه

شوقي ما أشتاق له لو زاد تعليله !
بالبال ما غاب باللهْ كيف أشتاقه ؟

العشق ثابت وان تغيّر بتشكيله
مثل الشجر بالخريف يبدل اوراقه!
عماد السرحان

أترك تعليق



التعليقات مغلقة.