صحيفة شعراء العرب الالكترونية

خاطري مكسور .. للشاعر مبارك الشلوي

  • 0

يا وجودي ليا هبت ذوراي الهبايب
واشركتني الهموم الجايره بشركتها

واقبل الليل متقرقش ظلامه وجايب
كل ما يتعب النفس ويزيد اغلقتها

وجد من هو فقد من خيرة القوم شايب
وشاف ربعه بعد موته تقل بركتها

و لعت بينهم فتنة نفاق وطلايب
والنميمه بعد ذيك الجموع افرقتها

دق صدره على عودن عليه النصايب
ركزوها بعد ما دفن عوده تحتها

وعند قبره وقف ودموع عينه سكايب
ما معه حيله ونفسه تردى بختها

واوجودي وجوده من زمان العجايب
ومن هموم تدق فؤادي بمطرقتها

والله إن خاطري مكسور والقلب طايب
من سنين على حزني تحط اوسمتها

انهكتني لياليها بيمنى المصايب
وشجرة العمر حت الدهر كل اورقتها

لا بغيت انبسط و اسج شبت لهايب
داخل الصدر وعروش الضمير اخمدتها

ما اشتكي من هجر و فراق سيد الحبايب
ضيقة النفس عن كل الأمور اصرفتها

ليت حزني على غرون عن العين غايب
كان اقول الصدف جابت ومني خذتها

وليت نفسي عطاها الله معطي الوهايب
قوة الاحتمال اليا البلاوي كوتها

البلا الجرح في قلبي عطيب الضرايب
وصدمتي جائرة كل النفوس اوجعتها

فاقد ن لي صحيب وفاقد ن لي قرايب
والهموم أتعبت روحي وحالي برتها

مبارك هلال الشلوي

أترك تعليق



التعليقات مغلقة.