إلّا قولي على طاري [ سؤال البراد ]
هل بقى للدفا : ديره وشمسٍ وريِف ؟

ها أنا مغترب ، أبحث لصدري بلاد
غايتي اجمع بْفصل الشتا فصل صيف

يا مرادي ، إذا باقي لقلبي مراد
يا عيون الفرح لا صار فرْحي كفيف

لملميني وفا ، بعضه تحوّل رماد
ما بقى به سوا قلب بْغيابك عفيف

واجمعيني كثر ما قد خذاك البعاد
كثر ما ترسمك [ذكرى وظلمه وطيف]

كثر ما صارت الذكرى بعيني سهاد
كثر ما أتبع طْيوفك : لآخر رصيف

كثر ما قد غشى وجه الحقيقه سواد
كثر ما قد ظهر بالاقنعه: وجه زيف

كثر ما كنت اسافر لك على كل واد
آتحسس دفاك بْطقس بارد، عصيف

ياما شلت بْكتوفي ما بقى من عتاد
سقت لك خطوتي وآنا برجلي : نزيف

وش تركتي ؟ تركتي أسئله بالفؤاد
كم سألني غيابك عن غيابك ، بـكيف

علّلي يا عسى ألقى لجرحي ضماد
بقبل العذر لو عذرك : مملّ وسخيف

دام ربي جمعنا وسْط هٰذي البلاد،
بجمعك داخلي : ديره وشمسٍ وريِف

هات صدرك بصدري، الحيا حيل زاد
وامزجي بالفصول وعيّشينا : خريف

الشاعر/خليل أبراهيم الجابري